స్వయంగా వెలిసావు

స్వయంగా వెలిసావు చాలా మార్లు ముక్తినిచ్చి
సాయంగా నిలిచావు చాలా సార్లు భక్తిమెచ్చి

పదాల నీ పాదాలు కడుగుతున్నా
కరుణించి కావరారా శంకరన్నా !!!

నీ కీర్తి తెలుపగా నా పదాల శక్తి యెంత
నీ మూర్తి చూడగా తెలిసెలేె యుక్తి కొంత

పదాల నీ పాదాలు కడుగుతున్నా
కరుణించి కావరారా శంకరన్నా !!!

ఆపదోస్తే చాలు సూడాల మా భక్తి
యెన్నటికి తెలిసేనో నీ ముక్తినిచ్చే శక్తి

పదాల నీ పాదాలు కడుగుతున్నా
కరుణించి కావరారా శంకరన్నా !!!

మూఢులం మేమంట, మాకేటి తెల్దంట
కోరికల వెంటుంటే, మరి ఆ సంగతేటంట

పదాల నీ పాదాలు కడుగుతున్నా
కరుణించి కావరారా శంకరన్నా !!!

నీకు అమ్మో సాన పన్లు నాకు తెల్సులే
నిన్న అమ్మకాడ అడిగినా నీకు సెప్తాదిలే

పదాల నీ పాదాలు కడుగుతున్నా
కరుణించి కావరారా శంకరన్నా !!!

సోమ్ములే లేనోడు సోమ్ములేటిస్తాడు
నమ్ము సాలంతే కష్టంలో కాస్తాడు

పదాల నీ పాదాలు కడుగుతున్నా
కరుణించి కావరారా శంకరన్నా !!!

వేదాలకన్నిటికి  సారమ్ము వీడే
నాదాలకన్నిటికి మూలమ్ము వీడే

పదాల నీ పాదాలు కడుగుతున్నా
కరుణించి కావరారా శంకరన్నా !!!

నీ దయ కావాలి

మంచిసెప్తే చాలు మరిగిపోతుంది నెత్తురంతా
చెడుసూస్తే చాలు కరిగిపోతుంది సత్తువంతా
పదాల నీ పాదాలు కడుగుతున్నా
కరుణించి కావరారా శంకరన్నా !!!

నన్ను నేను మార్చుకోవాలంటే హరా
నీ దయ కావాలి కదా శంకరా

పదాల నీ పాదాలు కడుగుతున్నా
కరుణించి కావరారా శంకరన్నా !!!

ఆపలేని కోరికలు విచ్చుకుంటే
కాపులేని అడవిలో చిచ్చు తంతే

పదాల నీ పాదాలు కడుగుతున్నా
కరుణించి కావరారా శంకరన్నా !!!

కోతినేరా సత్యముగా తోకలేదంతే
స్వాతిముత్యముగ మారాలి నీభారమంతే

పదాల నీ పాదాలు కడుగుతున్నా
కరుణించి కావరారా శంకరన్నా !!!

ఇంతకీ నిన్ను నేను నమ్మినట్టేగాదా
నాకేటి తెల్సు నీవే చెప్పిపెట్టరాదా

పదాల నీ పాదాలు కడుగుతున్నా
కరుణించి కావరారా శంకరన్నా !!!

సక్కంగా ఉండాలన్న కోరిక గొప్పది
నిక్కంగా అలా ఉండటం సాలా దొడ్డది

పదాల నీ పాదాలు కడుగుతున్నా
కరుణించి కావరారా శంకరన్నా !!!

నీది కాదుగా పక్కనోడి బతుకు
నీకెందుకది, నీ మెతుకు నువ్వు కతుకు

పదాల నీ పాదాలు కడుగుతున్నా
కరుణించి కావరారా శంకరన్నా !!!

నీవు వర్షించే వరాల జల్లువు

నువ్వు హర్షించేలా అడిగా మరి ఇవ్వు

పదాల నీ పాదాలు కడుగుతున్నా
కరుణించి కావరారా శంకరన్నా !!!

నా పంట పండాలి

నానేటి సేసినా తప్పనుకోక నా తప్పు కాయాల
మనసులో నిన్నుంచా ఇక నేను ఒప్పులే సెయ్యాల

పదాల నీ పాదాలు కడుగుతున్నా
కరుణించి కావరారా శంకరన్నా !!!

నిను కలుసుకోవాలి, నీతోటి తిరగాలి
నీ పాదమంటాలి, నా పంట పండాలి

పదాల నీ పాదాలు కడుగుతున్నా
కరుణించి కావరారా శంకరన్నా !!!

చాల సార్లడిగా, నావైపు సూడమని
నువ్వు సూత్తుంటావులే, అది నే సూదామని

పదాల నీ పాదాలు కడుగుతున్నా
కరుణించి కావరారా శంకరన్నా !!!

దయతోడ సూత్తుంటే కష్టమేమీలేక ఒళ్ళు బరువెక్కింది
ఊష్టమోస్తే చాలు శివ శివా‌ అంటూ, యెక్కెక్కి యేడ్చింది

పదాల నీ పాదాలు కడుగుతున్నా
కరుణించి కావరారా శంకరన్నా !!!

అందమంటే ఏది? ఇది కాదు, ఇల్లిదీ కాదు
అందకుండా అది సిత్తంలో దాగుంది కాదూ
పదాల నీ పాదాలు కడుగుతున్నా
కరుణించి కావరారా శంకరన్నా !!!

ఈబూధి పుండ్రాళ్ళు అవి నీకు ఇష్టాలు

ఈ ఒళ్ళంత పూసుకున్నా దాటించు కష్టాలు

పదాల నీ పాదాలు కడుగుతున్నా
కరుణించి కావరారా శంకరన్నా !!!

మీ పెద్దోడి పుట్టినరోజు ఈడ పూజలు, కుడుములు 

అసలు పుట్టుకే లేనోడ్కి రోజూ నా మనసు ముడుపులు

పదాల నీ పాదాలు కడుగుతున్నా
కరుణించి కావరారా శంకరన్నా !!!

బతుకునందు శక్తి ఎండంగ సంపుతున్నావురా
మనసునందు భక్తి నిండార నింపుతున్నావురా
పదాల నీ పాదాలు కడుగుతున్నా

కరుణించి కావరారా శంకరన్నా !!!

నా గుండెని పరిచినా

గద్దెలా మిద్దెలా నిన్ను పూజిస్తేటిస్తావ్
మహా అయితే ఒట్టి మోక్షాన్ని ఇచ్చెస్తావ్
పదాల నీ పాదాలు కడుగుతున్నా
కరుణించి కావరారా శంకరన్నా !!!

కాష్టంలో ఉంటావేటి ఎప్పుడు చూసినా
ఇష్టంతో ఉండరాదేటి నా గుండెని పరిచినా
పదాల నీ పాదాలు కడుగుతున్నా
కరుణించి కావరారా శంకరన్నా !!!

కోపమొస్తే అంతే ఇంక పట్టలేమంటగా నిన్ను
జాలిజూస్తే ఇంతే జట్టుకట్టిఒగ్గవింక మమ్ము

పదాల నీ పాదాలు కడుగుతున్నా
కరుణించి కావరారా శంకరన్నా !!!

నీ ఆలోచనలే రోజురోజంతా నమ్ము

కలకాలమిలా ఉండేలా వరమిమ్ము
పదాల నీ పాదాలు కడుగుతున్నా
కరుణించి కావరారా శంకరన్నా !!!

బూడిదిష్టమంటే ఏటనుకుంటారందరూ

మా చివరి రూపమదే అని తెలుసుకునేదెందరు
పదాల నీ పాదాలు కడుగుతున్నా
కరుణించి కావరారా శంకరన్నా !!!

పాములతో ఆటలేటి, పులితోలుతో బట్టలేటి

బడుగు బతుకుల ఇసము చిమ్మెటోళ్ళ సంగతేటి
పదాల నీ పాదాలు కడుగుతున్నా
కరుణించి కావరారా శంకరన్నా !!!

ఆది లేదు అంతం లేదు నీకు జన్మమా అదీ లేదు

నిన్ను నమ్మినా నాకు చిత్తంలో మర్మమేమీ చేతకాదు
పదాల నీ పాదాలు కడుగుతున్నా
కరుణించి కావరారా శంకరన్నా !!!

సత్తువుంటే కళ్ళు మూసుకుపోతాయేటి సిత్రం

ఈ విత్తు సత్తూ ఉంటే విప్పారిపోతాయిచిత్రం

పదాల నీ పాదాలు కడుగుతున్నా
కరుణించి కావరారా శంకరన్నా !!!

దైవచింతన

దైవమంటే భక్తి గుండెలో నిండాలి
ప్రదర్శించే భక్తొద్దు వెంటనే వీడాలి
పదాల నీ పాదాలు కడుగుతున్నా
కరుణించి కావరారా శంకరన్నా !!!

దేవుడున్నాడా అన్న అజ్ఞానం పోవాలి
దేవుడే దిక్కన్న సుజ్ఞానం రావాలి
పదాల నీ పాదాలు కడుగుతున్నా
కరుణించి కావరారా శంకరన్నా !!!

చెడు చేస్తే దైవచింతన దూరమౌతుంది
దైవచింతనలో చెడు కాలిపోతుంది
పదాల నీ పాదాలు కడుగుతున్నా
కరుణించి కావరారా శంకరన్నా !!!

ఐహిక సుఖము లాగుతుంటుంది
హరనామ స్మరణ చేరవేస్తుంది
పదాల నీ పాదాలు కడుగుతున్నా
కరుణించి కావరారా శంకరన్నా !!!

యాగాలు తపములు చేయలేవని తెలుసా
నిండార హరా అంటే చాలంట మనసా
పదాల నీ పాదాలు కడుగుతున్నా
కరుణించి కావరారా శంకరన్నా !!!

పాడుబుద్ధులు నేర్వ పది నిముషాల పని నీకు
పాడెరోజున గర్వమణిగాక చీకాకు
పదాల నీ పాదాలు కడుగుతున్నా
కరుణించి కావరారా శంకరన్నా !!!

సందడే సందడి

నిన్నొదల్ను నువ్వేటన్నా, కొట్టినా తిట్టినా
మరి నాకా శక్తియ్యాలి నువ్వే ఎట్టైనా
పదాల నీ పాదాలు కడుగుతున్నా
కరుణించి కావరారా శంకరన్నా !!!

సూస్తున్నా కదా, నీ ఇంటికొచ్చిన సంది
ఎటైనాదో ఈ గుండెలో సందడే సందడి
పదాల నీ పాదాలు కడుగుతున్నా
కరుణించి కావరారా శంకరన్నా !!!

వెండికొండల కూర్చుంటె నేనేటి ఆన్తాను
కుసింత కొండ దిగిరా, నువ్వన్నట్టె ఆడ్తాను
పదాల నీ పాదాలు కడుగుతున్నా
కరుణించి కావరారా శంకరన్నా !!!

నంది మందిలతో కైలాసమంతా కిట కిటా
మరి నా సంగతేంది, తీస్కుపో టక టకా
పదాల నీ పాదాలు కడుగుతున్నా
కరుణించి కావరారా శంకరన్నా !!!

కావమని కాకల్లె కావుకావన్నా
కానివానిని కాదు కాపుకాయరన్నా
పదాల నీ పాదాలు కడుగుతున్నా
కరుణించి కావరారా శంకరన్నా !!!

కనకమంటే, కాసులంటే, కన్నెలంటే వెంటెంటే
శునకమంటి మనసులింతే, ఇదే మనుషులంటే
పదాల నీ పాదాలు కడుగుతున్నా
కరుణించి కావరారా శంకరన్నా !!!

పుట్టిస్తావు, గిట్టిస్తావు, మధ్యలో మా తిత్తి తీస్తావు
ఏమాటరా నీది లింగా అంటే ఇట్టే కరిగిపోతావు
పదాల నీ పాదాలు కడుగుతున్నా
కరుణించి కావరారా శంకరన్నా !!!

నీ తలపులు

కళ్ళతో సూడాలంటే కనిపించవు
కలల్ల ఎప్పుడూ ఆడుతుంటవు
పదాల నీ పాదాలు కడుగుతున్నా
కరుణించి కావరాదా శంకరన్నా !!!

నువ్వు తలపులోకొస్తె ఏటేటో అనిపిస్తది
నా గుండె తలుపుల కోస్తె నీకు తెలిసొస్తది
పదాల నీ పాదాలు కడుగుతున్నా
కరుణించి కావరాదా శంకరన్నా !!!

సుక్క నీరు నీపై పోస్తే అబ్బో సంబరం
తైతక్కలోడా నీవే దిక్కురా సంతతం
పదాల నీ పాదాలు కడుగుతున్నా
కరుణించి కావరాదా శంకరన్నా !!!

మనిద్దరికీ ఎప్పుడో జట్టు కుదిరింది
నా మదినసలొదలని నీ పట్టు అదిరింది
పదాల నీ పాదాలు కడుగుతున్నా
కరుణించి కావరాదా శంకరన్నా !!!

అమ్మతో కలిసి షికారుకెళ్ళేవా సామీ
కుసింత పొద్దు పొడిచింది సూసుకో సుమీ
పదాల నీ పాదాలు కడుగుతున్నా
కరుణించి కావరారా శంకరన్నా !!!

జ్ఞానమంతా అమ్మకి సెప్పేసినావ్
ఏటి నేర్చుకోవాలో మా బుర్రకొగ్గేసినావ్
పదాల నీ పాదాలు కడుగుతున్నా
కరుణించి కావరారా శంకరన్నా !!!

ఇంతికి ఇంట్లో సగం, ఒంట్లో సగం
మరి నీ కాళ్ళకాడ నాకీయరాదా యోగం
పదాల నీ పాదాలు కడుగుతున్నా
కరుణించి కావరారా శంకరన్నా !!!

పెళ్లి పెళ్ళాం, ఇల్లు పిల్లలు తప్పవు
మళ్ళీ మళ్ళీ నీ ఆలోచనలు వదలవు
పదాల నీ పాదాలు కడుగుతున్నా
కరుణించి కావరారా శంకరన్నా !!!

ఈ మనసు

నేనెంతలే, మా రాత గీసే నీపై రాతలేటిలే
నీ బుద్ధి నాకిచ్చి రాయమన్నావులే
పదాల నీ పాదాలు కడుగుతున్నా
కరుణించి కావరారా శంకరన్నా !!!

చుక్కని చూస్తె చక్కగుండదు
చుక్కాని లేని ఈ పాడు మనసు
పదాల నీ పాదాలు కడుగుతున్నా
కరుణించి కావరారా శంకరన్నా !!!

నీ పేరింటే చాలు కాసేపు గెంతులేస్తాది
ఆనక చూస్తె, పక్కదారి పట్టేస్తాది
పదాల నీ పాదాలు కడుగుతున్నా
కరుణించి కావరారా శంకరన్నా !!!

కామాల్లేని కామాలలో మునకలు
జన్మంతా ఈటితోటే పరుగులు
పదాల నీ పాదాలు కడుగుతున్నా
కరుణించి కావరారా శంకరన్నా !!!

లింగం చూస్తె ఏడుపొస్తాది, ఆనందం
పక్కోడిని చూస్తే ఏడుపొస్తాది, కండకావరం
పదాల నీ పాదాలు కడుగుతున్నా
కరుణించి కావరారా శంకరన్నా !!!

కాసేపు అదిగో శివుడు ఉన్నాడంటాది
కాసేపు ఎవడా శివుడు ఉన్నాడా అంటాది
పదాల నీ పాదాలు కడుగుతున్నా
కరుణించి కావరారా శంకరన్నా !!!

నువ్వెక్కడున్నావని తిక్కచేసేది ఇదే
నువ్వు లేవన్నోడి తలతిక్కతీసేదీ  ఇదే
పదాల నీ పాదాలు కడుగుతున్నా
కరుణించి కావరారా శంకరన్నా !!!

నే కాయలేకున్నా ఈ మనసు పేచీ
ఒజ్జ వి నీవే, ఇక నీదే ఆ పూచీ
పదాల నీ పాదాలు కడుగుతున్నా
కరుణించి కావరారా శంకరన్నా !!!